أكلات مطعم تشيلز

[center]الوجبة الرئيسية:
(ستيك رب آي مشوي)
(خضار تشيليز المشوية الرائعه)
(بطاطس تشيليز المهروسة إللي تدووووخ)
(خبز الثوم المقرمش)

العصير: (بيناكولادا)
الحلى : (براوني صانداي)

ستيك رب آي مشوي:

المقادير:

شريحتين من ستيك (ريب آي) وهي أفخم نوع من أنواع اللحوم المستخدمة في عمل الستيك المشوي.تلقيها في السوبر ماركتات الكبيرة أو عند بعض اللحامين المتخصصين
ولازم القطعتين تكون عريضة شوي(إصباعين تقريبا عرضها) وحجمها بحجم (كف )اليد

تتبيلة الستيك ((وهي السر الكبير في عمله))

حبات ثوم مهروس ناعم
2ملعقتين من الخل الأسود
ملح
فلفل أسود
نصف فنجان شاي عصير ليمون
صوص دبس الرمان((هذا تلقوه ناحية الصوص والتتبيلات في السوبر ماركت)) مكتوب عليه كذا (دبس رمان)
(صلصة HP لشرائح اللحم) ((كمان تلقيها في صف الصوصات والتتبيلات))
زعتر بري مجفف((موجود في صف المتبلات والأعشاب في السوبر ماركت))
إكليل الجبل طازج((تلقيه في جهة الخضار الطازجة في السوبر ماركت..وهو يشبه في شكله(الشبت) لكن طعمه مختلف عنه تمااااما)) نفرمه ونجهزه

الطريقة:

غزي الشرائح في عدة مناطق بالسكين وعلى الوجهين حتى تتشرب الصوص الذي ستنقع فيه..
للصلصة..
نخلط جميع التوابل مع بعضها البعض وننقع شرائح اللحم فيها ونضعها في الثلاجة طوال الليل حى تتشرب الصوص وتلين قطعة اللحم لأنها عريضة شوي((يعني اليوم إللي تبغي تسوي فيه ستيك حطي الشرائح في الصوص من الليلة إللي قبلها وإنقعيه فيها طووول الليل أو لليوم الثاني))

اليوم الثاني ((إللي راح تعملي فيه الستيك))
جهزي شواية الفحم أو شواية كهربائية وإبدأي حطي عليها شرائح اللحم وإشويها ((وإدهنيها لما تنشف بالمتبقي من الصوص في الصحن إللي نقعنا فيه اللحم أمس)) هذي ترى خطوة مهمة
وكل شوي إقلبيه على الجهة الثانيه لين تنشوى الناحيتين تماما وتحسيها إستوت
وأغرزي السكين في الستيك لتأكدي إن كان إستوى من الداخل أو لأ..
وضعيه في طبق التقديم
الزبدة بالأعشاب:

طريقتها ومقاديرها هيه..
تحتاجي زبدة ذائبة (على حسب عدد المكعبات إللي تبغي تسويها))
عشبة الزعتر البري المجفف
ثوم مطحون ناعم
قوالب ثلج((بس إللي تجي دارية وفيها حركات حلووة مثل الأحرف والأشكال))نسخن الزبدة ثواني على النار ثم نضع عليها الثوم المهروس ونقلبه بسرعه شديده عشان لايينحرق لونه
وبعدين أحط فوقها قليل من الزعتر البري
وأقلبها بسررررعه لين تاخذ نكهة بعضها البعض وأطفي عليها النار
وأبدأ صبها في القوالب وأحطها بالفريزر تجمد..

طبعا من يوم تسوي الستيك على طول حطيها فوقه لأنها لما تذوب الزبدة مع الحرارة

خضروات تشيليز المشوية:
تشكيلة من الخضروات الطازجة والمغسولة جيدا
((كوسا-جزر-فلفل رومي-بروكلي- أكواز ذرة -وممكن تضيفي كمان أي خضار ثانيه تحبيها..))

كمية قليلة من الزبدة((مقدار ملعقتين طعام كبيرة))

بهارات متنوعه وهي
ملح- فلفل أسود-بابريكا((هذي تلقونها ناحية التوابل في السوبر ماركت بودرة حمراء مكتوب عليها بابريكا يعني فلفل حلو )) هاذا ترى مافيه إسم الحرارة مجرد نكهة ولون فقط
زعتر بري مجفف
قليل من زيت الزيتون (ملعقة واحدة فقط((ملعقة طعام)) لاتكثرو عشان مايبان طعمها))
الطريقة
أولا عزيزاتي من أهم أسرار خضروات تشيليز هو التتبيل
أخلطي كل من المتبلات السابقة كلها مع بعض وأضيفي عليها ملعقة حلى زبدة (مو كل مقدار الزبدة الذائبة..لأ ..ربع المقدار فقط))وملعقة طعام من زيت الزيتون
أخلطيهم جيدا وأتركيهم على جنب

الخضار..
أغسلي الكوسى والجزر جيدا ولا تقشرينهم بل نظفي قشرتهم الخارجية بفرشاة التنظيف الخاصة((أفركي بالفرشة وقليل من الخل الأبيض والملح جيدا حتى تزيلي الأتربة وما تبقى من مواد الرش العالقة))
وإذا ماعندك فرشة أفركيهم بالخل والملح بيدك..أهم شي إنهم ينظفوا تمااااما
وبعد كذه قطعيهم شرائح دائرية متساوية
بالنسبة لأكواز الذرة ما يحتاج لها شي إلا إنك تطلعيها من الفريزر من بدري((أنا أتكلم طبعا عن أكواز الذرة المجمدة إللي تجي نصف كوز أو ربع كوز)) تلقوها في الفريزرات في السوبر ماركت..وتنباع مجموعة في واحد كيس))

بالنسبة للفلفل الرومي نظفيه تمام من البذور الداخلية وقطعيه شرائح دائرية متساوية العرض

بالنسبة للبروكلي ((للي مايعرفوه)) هو نوع من الخضار المستوردة ويشبة في شكلة الطحالب البحرية ذات الشكل الشجري)) نظفيه تمام بالملح والماء

وبعد ماغسلنا الخضار تماااام التماااام
نقطع الجزر والكوسى شرائح بقشرهم طبعا..
الذرة نتركها مثل ماهي..
البروكلي نفكفكه عن بعضه شوي..

بعد كذه خذي كل الخضار و قلبيها بيدك وأفركي فيها خلطة التوابل السابق تحضيرها (كله بيدك عشان تتخللها التتبيلة))وأتركيها نصف ساعه

بعد كذه جيبي قدر كبير وحطي فيه ماء وخليه يغلي لين يطلع دخانه((أهم نقطه لأننا راح نطبخ الخضار على البخار))
وبعدين حطي مصفاة كبيرة عندك على القدر أو بوسطه بحيث إنها تكون مستواها أعلى من الماء((يعني تكون أخرام المصفاة فوق الماء وليست في وسطه))
وحطي في وسط هالمصفاة كل الخضار السابقة تمام
وإقفلي عليها وخليها 10 دقائق بالتمام بحيث إنها تستوي نص إستواء أو ثلاث أرباع إستواء أهم شي مانبغ الخضار تنهري معانا ((مهمة جدا هذي الخطوة))
((السر في الطهو بالبخار قبل الشوي هو:
1:تطرية الخضار قليلا قبل شويها
2:الإحتفاظ باللون الزاهي الأخضر للخضروات الخضراء

نعمل في هالوقت الصوص إللي راح أقولك عليه
وفلفل أسود وزبدة ذائبة
قلبيهم سوى وحطيهم في صحن صغير وجيبي فرشاة الدهن وإستعدي..
بعد كذه جيبي صينيه وجيبي ((شواية كهربائية من إللي تنقفل فوق بعضها وإللي ماعندها تستخدم طاوة عمل البيض أو طاوة الشوي((هذي مثل طاوة البيض تمام لكن تخلف عنها بوجود خطوط في قاع الطاوة ويكون شكل الطاوة مربع مو دائري)) عرفتوها ..هذي خاصة بالشوي..

جيبي بعد كذه الذرة وحطيها في الصينية وأدهنيها من كل الوجوه بالفرشاة بخليط الزبدة والفلفل
وحطيها في الصينية ودخليها الفرن وولعي عليها الشواية ((يعني من فوق )) وخليها تتحمر شوي ....كل إشوي إقلبيها على جهة من الجهات عشان تتحمر من كل النواحي..

جيبي بقية الخضار المطهوة بالبخار وولعي على طاوة الشوي أو الشواية الكهربائية ورصي الخضار فيها وخليهم كذه قدامك ينشوو تمام وبعدين إقلبيهم على الجهة الثانيه
خلال عملية الشوي لاااااااازم تدهنيهم بخليط الزبدة والفلفل الأسود..وإنتبهيلهم لاينحرقوا..

بس خلاص وبعدين إذا إنشوت الذرة وإنشوت الخضار تمام على الوجهين((أهم شي مايكونوا مهريين وهذا يعتمد بالأساس على طريقة طهوك لهم بالخضار في الأول))
وحطيهم في طبق التقديم بجنب الستيك..







بطاطس تشيليز المهروسة:

((المقادير للبطاطس))

4حبات بطاطس جيدة متوسطة الحجم
زبدة
(البهارات)
((فلفل أسود.ملح.زعتر بري.شطة سائلة,مكعب ماجي))
((الطريقة للبطاطس))
أولا نجيب فرشاة تنظيف البطاطس (أو أي فرشاة تنظيف خاصة بالخضار عندك) وطبعا كلنا نعرف البطاطس من أكثر الخضار إللي تشيل أتربه..
إنقعيها في وعاء عميق مغمور بالماء الساخن وقليل من الملح والخل.. وبعد كذه نظفي البطاطس بهذا النقيع مع الفرشاة جيدا((توصوا فيها)) والسر في أن الخل والملح ينظفوا تمام القشرة من أي شي عالق بها.. وترى ضروري تنظيف القشرة..

تمام.. بعد كذه حطي في قدر على النار كل التوابل والبهارات السابق ذكرها وهي..

((فلفل أسود.ملح.زعتر بري.شطة سائلة,مكعب ماجي))
طيب وماء سااااخن وقلبيها لين تفور مع بعضها تمام وبعد كذه غطسي حبات البطاطس فيها وخليها نصف ساعة تنسلق في هالنقيع لين تستوي ..

في هالأثناء راح نعمل الصلصة..
((مقادير الصلصة))
علبة حجم صغير من قشطة الخفق
زبدة
نص فص ثوم مهروس(لاتكثروا لأننا مانبيه يطغي على طعم الصلصة)
بهارات((ملح وفلفل أسود وبابريكا((هذي البابريكا أهم شي في الموضوع))
علبة جبن كرافت متوسطة (تشدر وليست السائلة)
((طريقة عمل الصلصة))
نضع قليل من الزبدة في قدر صغير على النار حتى تسيح ثم أضع عليها الثوم مهروس لثواااااااااني بدون أن يحمر ((إنتبهوا أنا أبغى النكهة بس))
وبعدين أضيف فوقه مقدار قشطة الخفق وأتركه يفور شويه لين يثقل قليل وبعدين أتبله بالملح والفلفل والبابريكا)
وإتركيها على جنب..
طبعا ألحين البطاطس إستوت
جيبي البطاطس وقشريها بالشوكة وإذا كان فيه بقايا من القشرة بسيطه على البطاطس مو مشكلة خليها لأنك منظفتها وتقدري تاكليها بعد ماأستوت البطاطس..((إنتبهي لاتكبي موية النقع وألحين أقولك ليش..
أهرسي البطاطس بواسطة شوكة وزحطي فوها شريحتين صغار من الزبدة وقلبيها مع البطاطس تمام لين تمتزج نكهة الزبدة مع البطاطس..
بعد كذه نجي لسر الطعم الرهيب في البطاطس..
خذي تقريبا 4 ملاعق كبيرة من ماء سلق البطاطس المتبل بالماجي والبهارات وإعجنيها مع البطاطس بالشوكة..
هالحركة راح تفيدك بكذا شي:
أولا:راح تخلي البطاطس متماسكة
ثانيا:راح تتبلك البطاطس وتخليلك طعمها جنان..

بعد ماعجنتيها ((مو تصير عجينه عجينه..يابنات أنا أقصد مفهوم العجن يعني المزج وليس العجن باليد فقط بالشوكة..))
بعد ماعجنتيها جيبي صينية بايركس أو تيفال مو مشكلة ماكو فرق..وتكوني مولعة الفرن من فوق((يعني الشواية ))
جيبي البطاطس وإكبسيها في زبدية صغيرة مثل حقت الشوربة تمام وإقلبيها بعدين في الصينية البايركس بحيث يكون شكلها مثل القبة..بعد كذه إبدأي إضغطي عليها من المنصف بحيث يصير شكلها مثل البركان((أـمنى تكونو فاهمين علي)) إنتبهوا لاتوصلوا لنهاية البركان لأ لنصفه فقط.. يعني الحفر بوسط القبة لايوصل للنهاية عشان لما نصب الصلصة فيها ونجي نشيل البركان ماتنكب الصلصة من وسط البركان(عجبني مصطلح البركان ماتشوفوني طيحّت عنده)
أهم شي يوصل المعنى خلاص لاتدققوا..
وسوي كل مقدار البطاطس زي كذه حيصير عندك مجموعه براكين صغيرة >>((أبو التعبير))
وبعد كذه إبأي صبي في داخل هالبراكين مقدار بسيط من الصلصة تمام ورشي الصلصة ببودرة البابريكا (قليل مو تكثروا طيب) وبعدين سيحي قليل زبدة وإدهني بالفرشاة أطراف البطاطس(البركان)
بعد كذه دخلي الصينية الفرن وراقبيه..بمجرد ماتحسي إنها بدأت تحمر شوي وتنشف البطاطس على طول طلعيها.. والسر في حركة الفرن هو:
أولا : راح تخليلك البطاطس متماسكة أكثر مع حرارة الفرن.
ثانيا: راح تخليلك الصلصة أغلظ مماهي عليه وقت صبها على البطاطس..
والسر في حركة دهن البطاطس بالزبدة هو:
أولا:تطرية البطاطس عشان ماتنشف كثير.
ثانيا : تعطي لمعه للبركان؟؟

بعد كذه لما تحمر شوي شيليها بالأداة إللي تشيلون فيها المكرونة عرفتوها..عشان تقدروا تشيلوا القطعه كلها دفعة وحده.. وحطوها في طبق التقديم جنب الستيك والخضار.




الخبز بالثوم:

ثوم مهروس ناعم(طازج)
زعتر بري
زبدة
عصير نصف ليمونه طازجه
ملعقة شاي نشا محلولة في نصف فنجان قهوة من الماء
صلصة شركة السلطانه((صلصة الأعشاب بالثوم و بالليمون)) هذي تلقوها جهة الصلصات في السوبر ماركت..وقارورتها طويله شوي..ولون الصلصة إللي جوى أخضر..
ياليت إللي تعرفها وتملك صورتها تحطها للبنات عشان يستفيدوا..
الطريقة
سهلة جدا..
أولا تقطعي الخبز الفرنسي شرائح ولكن مائلة قليلا بحيث تصبح مشطوفه قليلا...
ثم نعمل الصوص..
فيه عندك طريقتين للصوص..
أولا؛في حال تواجدت عندك صلصة السلطانه السابق ذكرها فنقوم بعمل مايلي..
أولا نذوب قليل من الزبدة في طاوة البيض ونضيف فوقها صلصة السلطانه((حسب كمية الخبز إللي راح تعمليه)) وتخليها تفور شوي مع التقليب السريع لمدة دقيقة..
ثم ندهن الخبز على الوجهين بالخلطة بواسطة فرشاة الطعام
ونكون مولعين الفرن من فوق(الشواية)
وندخلها الفرن لين يحمر وجهها الأول بعدين نقلبها على الوجه الثاني لين يحمر الوجه الثاني بعد كذه نقدمها مع الستيك وهي سااااخنه

الطريقة الثانيه في حال عدم تواجد صلصة السلطانه لديكي..راح أعلمك كيف تعملي الصوص بنفسك في البيت..وصدقوني يضاهي صلصة السلطانه في الطعم..بدون مبالغه والتجربية خير برهان..
أولا نذوب قليل من الزبدة في طاوة البيض ((حسب كمية الخبز إللي راح تعمليه)) ثم نضع عليها قليل من الثوم المهروس ونقلبه ثواني في الزبدة((إنتبهوا لايتغير لونه بس مجرد تاخذ الزبدة نكهة الثوم)) وبعدين نضيف لها الزعتر البري..ونقلبه جيدا معها.. ثم نضيف لها محلول النشا..ونقلبها حتى تغلظ الخلطة قليلا.. ويستوي النشا..وشرط النار تكون واااااااااااطية جدا وماتكون عاليه عشان ماينحرق..ونطفي عليها.. ونضيف لها قليل من من عصير الليمون((حسب رغبتك))
ونقلبها جيدا...ثم ندهن الخبز على الوجهين بالخلطة بواسطة فرشاة الطعام
ونكون مولعين الفرن من فوق(الشواية)
وندخلها الفرن لين يحمر وجهها الأول بعدين نقلبها على الوجه الثاني لين يحمر الوجه الثاني بعد كذه نقدمها مع الستيك وهي سااااخنه

سلطةقيصرأوالسيزر:

أولا الخضار..
نحتاج كمية كبيرة من الخس((ممكن تستخدمي أي خس بس ألذ خس هو الأمريكي))بس مع المقاطعه أفضل إنكم ماتستخدموه كثير..+ كمية كبيرة من الملفوف الأحمر

طريقتها:
نغسل الخس والملفوف جيدا ..ثم نمزع أوراق الخس بطريقة عشوائية ونضعها في طبق التقديم..
والملفوف بالسكين نقطعه شرائح عريضة..
نضع الكل في طبق التقديم..ويوضع على جنب..

ثانيا: بالنسبة للصوص المستخدم للسلطة..فيه حاجتين مهمه
أولا ياإنك تشتري صوص السيزر سلط الجاهز موجود في السوبر ماركتات الكبيرة فقط
وفيه نوعين منها
واحد منهم كريمي ولونه أبيض كريمي ومكتوب عليه
CAESAR SALAD CREAMY SOUS
والنوع الثاني شفاف لون أصفر شفاف ومكتوب عليه
CAESAR SALAD SOUS
لكن لو مالقيتي هذي الصوصات وماقدرتي تحصلي عليها فراح أعطيكي طريقة الصوص تعمليه في البيت..
وهي كالآتي..

صلصلة سلطة سيزر
ملعقتين كببيرة(ملعقة طعام) مايونيز
ملعقة كبيرة من الخل الأبيض
ملعقه صغيره من سمك الانشوجه ( وهذي تلقيها في صف معلبات التونه في السوبر ماركت ولها طعم قوي و حاذق ) وتراها أهم شي في السيزر سلط وطعمها يجنن معاها لاتنفجعوا عشانوا سمك..تراه سمك صغير جدا مثل الأصابع وخالي من العظم ومجرد إنه يعطي نكهه للصوص ومافيه طعم زفارة ولا شي وعلى ضمانتي..
ملعقتين من زيت الزيتون
ملعقتين كبيرة من عصير ليمون
ملعقه صغيره بذور الكابرز المخلله ( وهذي تلقينها بسهوله مع المخللات في السوبر ماركت وسعرها رخيص والعلبه تكفيك عدة مرات )

حطيهم سوا في الخلاط ماعدا زيت الزيتون وأخلطي لحد ما يتجانس الخليط بعد كذه وإنتي بتخلطي الخليط(بعد ماتجنس طبعا وإختلطت المكونات تمام)) إبدأي بالتدريج بإضافة زيت الزيتون حتى يبدأ يغلظ الخليط معاكي..وبكذه صار عندنا الصوص وتقدري تحتفظي فيه في الثلاجة..


ثالثا؛ الدجاج المشوي المتبل..
نحتاج إلى صدور دجاج شرائح مخليه من العظم+ثوم مهروس+ زبدة+أوريغانوا أو زعتر بري+ قليل من عصير الليمون الطازج..

طريقتها:
نقطع صدور الدجاج إلى شرائح رفيعه طويلة..ثم نضع في مقلاة الشوي((المخططة)) التي تحدثت عنها سابقا في الخضار أو ممكن إستبدالها بمقلاة البيض العادية
نضع في المقلاة القليل من الزبدة لتذوب..ثم نضع عليها الثوم حتى يصفر فقط بدون أن يحمر أو يتكشن إنتبهوا.. ثم نضع شرائح الدجاج المقطعه وتشوى وكل شوي نقلبها على الوجه الثاني حتى تحمر من كلتا الجهتين..ثم نخلط الأوريغانو أو الزعتر البري مع عصير الليمون ونضعه فوق الدجاج المشوي في ال مقلاه ونقلب قليلا علا النار ثم نشيل الدجاج على جنب..

رابعا:الخبز المحمص..
نحتاج إلى خبز فرنسي(الطويل) أو يستبدل بـ(التوست)+صوص (السلطانه) بالأعشاب والثوم والليمون..أو يمكن إذا مالقيتي هذا الصوص تعملي بداله هالصوص البيتي((زبدة سايحة+ ثوم مهروس +زعتر بري+ملعقة كبيرة زيت زيتون +قليل من عصير الليمون))
تسيحي الزبدة على النار وتحطي عليها الثوم المهروس لثواني وإطفي النار وأضيفي له عصير الليمون والزعتر البري وزيت الزيتون وأخلطيه جيدا..
طريقته:
يقطع الخبز مكعبات صغيرة ويدهن بالصوص ونخله الفرن ونولع عليه الشواية حتى يجمر قليلا..ونتركه على جنب..

خامسا:جبن بارميزان مبشور((موجود في جهة الألبان والأجبان في السوبر ماركتات))

طريقة عملهم مع بعض هي كالتالي..
نخلط قليل من صوص السيزر+الجبن البارميزان مع الخس والملفوف جيدا ثم نضعهم في طبق التقديم..
ثم نرص شرائح الخبز ثم شرائح الدجاج المشوي.. ثم نصب قليل من الصوص على الوجه وترش بالجبنه البارميزان وتقدم..
هذه السلطة تؤكل بارده..

البيناكولادا ((طريقتي الخاصة))((المشروب الإستوائي الرائع))

المقادير تكفي تقريبا لكأسين من العصير

حلقتين كبيرة أو 3 من الأناناس,
كأس من ماء الأناناس أو كأس ماء بارد جداً إن لم يتوفر ماء الأناناس,بس طبعا الأفضل في الطعم ماء الأناناس
سكر حسب الرغبة,
ملعقتين أو ثلاث من الحليب البودرة ,
كأس من حليب جوز الهند السائل ((يتوفر حليب جوز الهند سائل في بعض السوبر ماركتات الكبيرة وإذا لم يتواجد ضعي مقدار ملعقتين طعام كبيرة من جوز الهن أو النارجين في كوب من الحليب وأتركيه طوال الليل ثم صفيه في اليوم الثاني وإستخدميه في المشروب))
ملعقتين كبيرة من آيس كريم بالفانيليا,
وللزينة: نصف حلقة من الأناناس الطازج. وحبة من الكرز الأحمر

الطريقة

تخلط جميع المقادير السابقة كلها في الخلاط الكهربائي جيداً ثم يصفى جيدا ويصب في كؤوس التقديم ويقدم بارداً..
طبعا فيه سر في بيناكولادا تشيليز وهو راااائع وراح أدلكم عليها

((أحضري كأس به حليب وحلّيه بملعقة حلى (وسط) سكر وقلبيه جيدا ثم صبيه في قوالب ثلج وأتركيه حتى يجمد

ثم في وقت التقديم أخرجي الثلج وأجرشيه جرش خشن ثم ضعيه في كؤؤس التقديم وصبي فوقه المشروب...

وإللي تسوي هالحركة راح تذوق طعم مو طبييييييييييييييعي في البينا كولادا




((حلى البراوني صاندي))

أول شي بالنسبة لكعكة البرواني راح أوصفها لكم عموما بشكل مبسط
هي تشبه الكيك العادي إللي نعمله بس الفرق إنها متماسكة أكثر وقطعتها عرضها أقل من الكيك العادي وذلك يرجع لدسامتها...لأنها ثقيلة شوي وغنية بالمكسرات وقطع الشوكولاتة..

فإذا حابة تعملي البراوني في البيت راح أعطيكي الطريقة بالتفصيل
وإذا حابة تشتريها من السوبرماركت تلقيها في جهة الكيك وأدوات الزينه الخاصة بالحلويات وهيه تجي في كرتونه مثل كرتونة كيك العلالي أنا عادة ألقاها في شركة(بيتي كروكر) وتجيكي أنواع في شي منها كمية قطع الشوكولاتة أكثر وفي شي منها بدون مكسرات وفي شي منها فيها مكسرات وشوكولاتة سوى..مافي فرق عزيزتي إختاري إللي تحسيه يناسبك أو إللي تحبيه إنتي ..مو شرط تلتزمي بإختياري لأني راح أختار إللي فيها مكسرات وقطع شوكولاتة عشان تصبح بالضبط مثل كيكة تشيليز..


بالنسبة لمقادير البراوني فأنا راح أعطيكم طريقة شركة هيرشي المتخصصة في الحلويات ..وهس مضمونة بإذن الله 100 %
المقادير:
بيضتان
-نصف ملعقة صغيرة بيكربونات الصودا-
نصف كوب ماء مغلي-
ملعقة صغيرة فانيليا-
كوبين سكر
واحد وثلث كوب طحين-
ربع ملعقة صغيرة ملح-
ثلثين كوب زبدة مذابة ومقسمة
كوب واحد من حبيبات هرشي HERSHEY’S SPECIAL DARK Chocolate Chips
ثلاث أرباع كأس من المكسرات المشكلة (عين الجمل ولوز وكاجو) تكون مجروشة


وهذي صورة شوكولاتة هيرشي


الطريقة(لعمل البراونيز)
سخني الفرن على حرارة 350 وادهني الصينية ثم اخلطي مع بعض الكاكاو والبيكنج صودا في وعاء كبير
اخلطي ثلث كوب زبدة معهم اضيفي الماء المغلي وحركي حتى يثخن المزيج أضيفي واخلطي مع المزيج السابق السكر والبيض وباقي الزبدة وحركيه حتى يصبح ناعما أضيفي الطحين والفانيليا والملح اخفقي جيدا ثم اضيفي حبيبات الشوكلاتة والمكسرات اخبزي لمدة 35 ل 40 دقيقة او حتى يبدا البراونيز بالارتفاع من الجوانب دعيها تبرد جيدا وهي بالصينية

نجي لطريقة عمل البراوني صاندي والكمية إختيارية لأنها على حسب أعداد الأشخاص وبالقطعة.. في حال عملتي صينية براوني سنحتاج للتالي..

المقادير:
علبة أيس كريم فانيليا
بعض المكسرات للزينه
ولصوص الشوكولاتة((فنجان زيت-ملعقتين كبيرة شوكولاتة بودرة غامقة- نصف فنجان سكر- فنجان حليب بودرة-فنجان ماء مغلي))

الطريقة:
أولا لعمل صوص الشوكولاتة
تخلط جميع المقادير السابقة لعمل الصوص ((فنجان زيت-ملعقتين كبيرة شوكولاتة بودرة غامقة- نصف فنجان سكر- فنجان حليب بودرة-فنجان ماء مغلي)) جيدا في الخلاط
ثم نعمل لها حمام مائ والسر في الحمام المائي حتى تذهب نكهة الزيت..وفي نفس الوقت عشان تمتزج المكونات في الحرارة وتصبح لها لمعة رائعه مثل الصوصات المستخدمة في محلات الآيسكريم
طبعا كلكم تعرفوا الحمام المائي وهو أن تضعي قدر كبير فيه ماء يفور وتضعي في وسطه قدر آخر أصغر وتضعي بالقدر الصغير مكونات الصوص ونشعل النار ونتركها تنطهي قليلا حتى تبدء تسخن ونقلبها قليلا ثم نطفي عليها...
لعمل البرواني صاندي نقوم بمايلي..

نقطع البراوني قطع مربعه ونضعها في صحون التقديم ثم توضع في المايكويف(هذي الخطوة مهمة لأني أبغ البراوني ساخنه جدا)أو إذا ماكان عندك مايكرويف ممكن تخلي البراوني في صينيتها قليلا في فرن ساخن لمدة دقيقتين..
ثم ضعيها على طوووول في صحون التقديم وضعي فوق كل قطعة كورة كبيرة من الآيس كريم راح تلاحظي الإيسكريم يبدأ يذوب فوق البراوني وهذا سرها(طبعا جزء بسيط إللي يذوب عشان كذه لازم تتقدم بسرعه)) وضعي فوق الآيسكريم الصوص الساخن والمكسرات وقدميها مباشرة..